નવસારી જિલ્લા પ્રભારી અને નાણા મંત્રીશ્રી કનુભાઈ દેસાઈના અધ્યક્ષસ્થાને નવસારી જિલ્લા આયોજન મંડળ સહિતના જિલ્લાના જનહિતલક્ષી વિકાસકામોની સમીક્ષા બેઠક યોજાઈ
નવસારી જિલ્લા આયોજન મંડળ હેઠળના વિકાસકામો, ન્યુ ગુજરાત પેટર્ન, પીએમ જનમન સહિતના સંકલન પ્રશ્નોની સમીક્ષા કરાઈ - વિકાસકામો ગુણવત્તાસભર અને સમયમર્યાદામાં પરિપૂર્ણ થાય તે દિશામાં કાર્ય કરવાનો અનુરોધ કરતા નાણામંત્રી કનુભાઈ દેસાઈ ----- નવસારી,તા૧૯: નવસારી જિલ્લાના પ્રભારી મંત્રી અને રાજ્યના નાણા, ઉર્જા અને પેટ્રોકેમિકલ્સ મંત્રીશ્રી કનુભાઈ દેસાઈના અધ્યક્ષસ્થાને આયોજિત નવસારી જિલ્લા આયોજન મંડળની બેઠકમાં ૨૦૨૨-૨૩ થી ૨૦૨૪-૨૫ના વર્ષ દરમિયાનના વિકેન્દ્રિત જિલ્લા આયોજનની વિવિધ યોજના હેઠળ પ્રગતિવાળા, શરૂ ન થયેલા વિકાસકામો, ન્યુ ગુજરાત પેટર્ન, પીએમ જનમન સહિતના સંકલન પ્રશ્નો, જિલ્લા સ્વાગત, ડિઝાસ્ટર, પુરવઠા તથા જિલ્લામાં ચાલતા અગત્યના પ્રોજેક્ટસોની સમીક્ષા કરવામાં આવી હતી. જિલ્લા કલેકટર કચેરીના સભાખંડમાં યોજાયેલી બેઠકમાં પ્રભારી મંત્રીશ્રી કનુભાઈ જિલ્લાની કામગીરીની પ્રશંસા કરતા જણાવ્યું હતું કે, નવસારી જિલ્લાની કામગીરી ઘણી સારી છે. રાજ્ય સરકાર સર્વે વિસ્તારોના સર્વાંગી વિકાસ માટે પ્રતિબદ્ધ છે ત્યારે વિકાસકામો ગુણવત્તાપૂર્વક અને સમયમર્યાદા શરૂ થાય અને પુર્ણ થાય તે અંગે કાર્ય કરવા જરૂરી છે. મંત્રીશ્રીએ વધુમાં જણાવ્યું હતું કે, જિલ્લામાં વિધવા પેન્શન મેળવતી મહિલાઓ તથા દિવ્યાંગજનોને સરકાર દ્વારા એન.એફ.એસ. કાર્ડ હેઠળ અનાજ આપવાની જોગવાઇ છે ત્યારે આવા કોઈ લાભાર્થીઓ લાભથી વંચિત ન રહે તે માટે જરૂરી તકેદરીવા સંબંધિત અધિકારીને જણાવ્યું હતું. આ બેઠકમાં આયોજન મંડળના વિવિધ કામોમાં આયોજનમાં લેતી વેળાએ બિનજરૂરી હેતુફેર ન થાય તે અંગેની તકેદારી રાખવાનું જણાવ્યું હતું. ધારાસભ્ય શ્રીઓ દ્વારા નવી અસ્તિત્વમાં આવેલી ગ્રામ પંચાયતના વિભાજનનું મહેસુલી રેકર્ડ છુટુ પાડવા તથા હોમગાર્ડની કચેરીને લગતા પ્રશ્નો રજુ કર્યા હતા જે બાબતે મંત્રી શ્રીએજરૂરી કાર્યવાહી કરવાની સુચના આપી હતી. બેઠકમાં જાન્યુઆરી-૨૦૨૩થી જુન-૨૦૨૪ દરમિયાન સ્વાગત પોર્ટલમાં ગ્રામ પંચાયત કક્ષાએ આવેલી ૨૫૨૦, તાલુકા કક્ષાએ ૯૩૭ અરજીઓ તથા જિલ્લાકક્ષાએ ૧૩૭ જેટલી વીજપોલ ખસેડવા, ઈ-ધરા ક્ષતિ સુધારા હુકમ, દબાણ દુર કરવા, આવાસ યોજના, પેઢીનામા,રેશન કાર્ડ જેવી અરજીઓનો નિકાલ કરવામાં આવી હોવાની વિગતો આપી હતી. ડિઝાસ્ટર મેનેજમેન્ટ હેઠળ જિલ્લા કંટ્રોલ સેન્ટર સહિત લાયઝન અધિકારીઓની નિમણુંક કરવામાં આવી છે જિલ્લામાં ૪૫૪ આશ્રયસ્થાનો નક્કી કરવામાં આવ્યા છે. વર્ષાઋતુમાં થયેલા માનવ મૃત્યુમાં ૧૨ લાખની સહાય એનાયત કરવામાં આવી હોવાનું ડિઝાસ્ટર અધિકારીએ જણાવ્યું હતું. નવસારી જિલ્લામાં ૧૮૧૪૪૬ એન.એફ.એસ.એ.ના રેશનકાર્ડ ધારકો તથા ૯૦૮૯૮ નોન NFSAના કાર્ડ ધારકોની વિગતો રજુ કરવામાં આવી હતી. આ ઉપરાંત જિલ્લામાં ચાલતા પીએમ મિત્ર પાર્ક, વાધરેચ ટાયડલ ડેમ, પુર્ણા ટાયડલ ડેમ, સિવિલ હોસ્પિટલ તથા મેડિકલ કોલેજના કામની પ્રગતિની વિગતો મંત્રીશ્રી સમક્ષ પાવર પોઇન્ટ પ્રેઝન્ટેશન દ્વારા રજુ કરવામાં આવી હતી. આ બેઠકમાં જિ.પં પ્રમુખશ્રી પરેશભાઇ દેસાઇ, ધારાસભ્યશ્રી રાકેશ દેસાઇ, નરેશ પટેલ, કલેક્ટરશ્રી ક્ષિપ્રા આગ્ર, જિલ્લા વિકાસ અધિકારીશ્રી પુષ્પલતા અને અન્ય પદાધિકારીશ્રીએ તથા જિલ્લાના અધિકારી કર્મચારીઓ ઉપસ્થિત રહ્યા હતા
Comments
Post a Comment